न्युजप्रिन्ट तत्काल छुटे यायेत सराकारयात निर्देशन
कान्तिपुर पब्लिकेशनया न्युजप्रिन्ट भारत पाखें छुटे यायेत संसदया सार्वजनिक लेखा समितिं सरकारयात निर्देशन ब्यूगु दु ।
कान्तिपुरया न्युजप्रिन्ट भारतया कोलकताय् दिकेमाःगु कारण व उकी सरकारं यानाच्वंगु पहलया बारे शुक्रवाः समितिं कार्यवाहक परराष्ट्रमन्त्री व वाणिज्य मन्त्रीनाप काःगु स्पष्टिकरण लिपा न्युजप्रिन्ट याकनं छुटे यायेगु व भविष्यय् थंज्याःगु समस्या वयेमबीत सजग जुइत सरकारयात निर्देशन ब्यूगु खः । उगु स्पष्टिकरणय् निगूलिं मन्त्रालयया सचिवतय् उपस्थिति नं दुगु खः ।
बैठकय् कार्यवाहक परराष्ट्र मन्त्री प्रकाशशरण महतं सरकारयात थुकीया बारे जानकारी लिबाक्क जक वःगु धयादिसें थुकीया बारे सरकारयात जानकारी वयेवं न्युजप्रिन्ट छुटे यायेत सरकारं पहल याःगु खँ धयादिल ।
वाणिज्य मन्त्री महतं पारवहन अधिकार सुरक्षित यायेत सरकार सजग जूगु धयादिसें सरकारं थुकीया बारे पत्रिका ब्वनाः जक जानकारी दुगु व उगु जानकारी दयेवं तत्काल सरकारं पहल न्ह्याकूगु धयादिल । वय्कलं शंकाया भरय् टिका टिप्पणी मयायेत इनाप यानादिसें थुकीं छिमेकी देय् नापया स्वापु स्यनेफुगु धयादिल ।
