नेपाल टेलिभिजनय् समावेशी ज्याझ्वः दिकल
येँ (सन्ध्या टाइम्स)/नेपाल टेलिभिजनं प्रशारण याना वयाच्वंगु थीथी भाषाभाषीया समावेशी ज्याझ्वः आःयात स्थगित याःगु दु ।
थःथःपिनि ज्याझ्वः बन्द याःगु खँयात कयाः थीथी भाषाया समावेशी ज्याझ्वःया सरोकारवालात थौं डेलिगेशन वनेत्यंगु दु। न्हिंन्हिं सनिलया ४:२० बजे प्रशारण जुइगु उगु ज्याझ्वःयात विश्वकप फटबल शुरु जुसांनिसें बन्द याःगु खः।
न्हापां नेपाल टेलिभिजन टू पाखें प्रशारण यानाः लिपांगु इलय् वयाः नेपाल टेलिभिजनं हे प्रशारण याना वयाच्वंगु उगु समावेशी ज्याझ्वः आःयात दिकाः उकिया थासय् वहे इलय् मेगु हे ज्याझ्वः प्रशारण यानाच्वंगु दु। तर नेपाल टेलिभिजनं छाय् अथे यायेमाःगु धकाः सम्बन्धित ज्याझ्वः सञ्चालकतय्त जानकारी तकं बिउगु मदुनि। थौंकन्हय् नेपाल टेलिभिजनं नेपालभाषाया नेवाः दबू, नापं मैथली भाय्, शेर्पा भाय्, उर्दु भाय् नापं थीथी भाय्या यानाः खुगू भाय्या ज्याझ्वः प्रशारण याना वयाच्वंगु खः ।
हाकुगु न्हियात प्रतिबन्ध
नेपाल टेलिभिजनय् आइतवाः पतिकं प्रशारण जुया वयाच्वंगु नेपालभाषाया ज्याझ्वः 'नेवाः दबू' या हाकुगु न्हि सम्बन्धि ज्याझ्वःयात प्रतिबन्ध तया बिउगु दु। वंगु जेष्ठ १८ गते हाकुगु न्हिया झ्वलय् नेवाःतय्सं याःगु ज्याझ्वः बारे टेलिभिजनया नितिं तयार याना छ्वःगु सामग्री प्रशारण मयाःगु खः। हाकगु न्हि नेवाः राजनीति जुल धकाः प्रशारण मयाःगु खँ धाःगु दु ।
