'राजीनामा मबिउसा विद्रोह यायेमाः'
येँ (सन्ध्या टाइम्स)/एकीकृत नेकपा (माओवादी) या अप्वः धइथें पोलिटब्यूरो नेतातय्सं आःया अवस्थाय् प्रधानमन्त्री माधव नेपालं राजीनामा मबिल धाःसा विद्रोह यानाः वनेमाः धकाः बः बिउगु दु ।
माओवादीया न्ह्यानाच्वंगु पोलिटब्यूरो बैठकय् न्ववाःपिं नेतातय्सं प्रधानमन्त्रीं राजीनामा मबिसे संविधान निर्माण व शान्ति प्रक्रियायात पनातल धाःसा जन विद्रोहय् हे वनेगु जुइ धकाः बः बियादीगु खँ माओवादीया छम्ह पोलिटब्यूरो नेतां 'सन्ध्या टाइम्स' यात थौं सुथय् कनादिल ।
वंगु असार १ गतेनिसें न्ह्याःगु बैठकय् माओवादीया नेतातय्सं थःपिनिगु खँ स्पष्ट रुपं तयेगु नापं आः महाधिवेशन, राष्ट्रिय सम्मेलन यानाः न्हूगु हे कथं न्ह्याः वनेमाः धकाः नं गुलिसिनं खँ तयादीगु खः ।
यथास्थितिइ गुगुं नं हालतय् व्यवस्थापिका संसदय् सरकारया बजेट नापं नीति तथा कार्यक्रम प्रस्तुत याके बी मजिउ नापं पार्टी कडा रुपं प्रस्तुत जुइमाः धकाः अप्वःसिनं खँ तःगु जुयाः माओवादी थुगुसीया संसदया बजेट अधिवेशनय् आक्रमक रुपं प्रस्तुत जुइगु संभावना अप्वया वःगु दु ।
