ख्वपय् थीथी खलःतय् सक्रियताय् गुंला बाजं ब्वज्या
ख्वप (सन्ध्या टाइम्स)/थनया विश्वकर्मा छेँ गुंला बाजं खलःया सछिदँ बुदिंया लसताय् ८४ दँ पुलेधुंकूम्ह खलःया नायः तीर्थराज शाक्यया सभापतित्वय् गुंला बाजं ब्वज्या जुल ।
वंगु शनिवाः १०१ दँ दुम्ह मय्जु छलमाया शाक्यं सुकुन्दाय् मत च्याकाः ब्वज्याया उलेज्या यानादीगु खःसा विश्वकर्मा छेँ गुंला बाजं खलःया छ्याञ्जे सुरेशराज शाक्यं लसकुस यानादीगु खः। ब्वज्याय् भक्तपुर बौद्ध सम्पदा संघया छ्याञ्जे महेन्द्रराज शाक्यं गौतम सिद्धार्थयात अति लोकप्रिय बाजं गुंला बाजंया धुन जूगुलिं थ्वयात बौद्ध सम्पदा कथं चीरस्थायी कथं ल्यंका तयेमाःगु व थुकियात न्हू पहः कथं न्हूगु पुस्तायात हस्तान्तरण याना वनेमाःगु खँ कुलादिल।
विराट गुथि ख्वपया लाय्लामा एफ.एम.ज्याझ्वःया संचालक प्रदिप शाक्यजुं थौं देश संघीय लोकतान्त्रिक व धर्मनिरपेक्ष राज्य धकाः अन्तरिम संविधानय् उल्लेख जूसांतबि खतरा मुक्त मजूगु खँ कुलादिसें नेवाःत मध्येनं शाक्य वज्राचार्यत राजनैतिक चेतना व जागरुकताया अभावं लिउने लाना च्वंगु खँ कुलादिल ।
उगु गुंला बाजं ब्वज्याय् भोतया पारावर्त महाविहार गुंला बाजं खलः, विश्वकर्मा छेँ गुंला बाजं खलः ख्वपया क्वःनेया गुंला बाजं खलः व इन्द्रवर्ण महाविहार गुंला बाजं खलकं गुंला बाजं थानाः थःथःगु कला व सीप प्रदर्शन याःगु खः। थथेहे गुंला बाजं खलःया गुरुपिंत व सछिदँ पुलेधुंकूम्ह मय्जु छलमाया शाक्ययात दोसल्लां न्ययेकाः हनापौ नं लःल्हायेगु ज्या जूगु खः ।
