उद्योग वाणिज्य महासंघं विनोद चौधरीयाके स्पष्टीकरण काइगु
येँ (सन्ध्या टाइम्स)/नेपाल उद्योग वाणिज्य महासंघं नांजाःम्ह उद्योगपति विनोद चौधरीयाके स्पष्टीकरण काइगु जूगु दु। चौधरी नेपाल उद्योग परिसंघया नं नायः खः ।
चौधरीं परिसंघ नायःया हैसियतं नेपाल उद्योग वाणिज्य महासंघ विरुद्ध अवशव्द प्रयोग याःगु खँयात कयाः वय्कःयाके महासंघं स्पष्टीकरण कायेत्यंगु खः ।
नेपालं पिने निर्यात जुइगु सामानया लागिं माःगु उत्पत्तिया प्रमाणपत्र सुनां जारी यायेगु धइगु खँय् पिहां वःगु विवादया झ्वलय् चौधरीं महासंघ विरुद्ध अवशव्द प्रयोग याःगु खः ।
थुकियात कयाः महासंघं वय्कःयात कारवाही यायेगु लाकि मयायेगु धकाः महासंघया अनुसशासन कमिटीयात जिम्मा बिउगु खः। अनुशासन कमिटीया थौं च्वंगु बैठकं चौधरीयाके स्पष्टीकरण कायेगु धकाः निर्णय याःगु खः। यदि स्पष्टीकरणं चित्त बुझे मजुल धाःसा मेगु कारवाही नं जुइफु धाःगु दु ।
उत्पत्तिया प्रमाणपत्र जारी यायेगु अधिकार न्हापा महासंघयात जक बियातःगु खःसा उकुन्हु वयाः सरकारं थ्व अधिकार परिसंघयात नं बीवं निजी क्षेत्रया उद्योग व्यवसायीतय् दथुइ विवाद ब्वलंगु खः। उद्योग वाणिज्य महासंघं देशय् शान्ति कायम यायेगु लागिं प्रधानमन्त्रीं राजीनामा बीमाः धइगु सः तःगु कारणं सरकारं ब्वलासायेगु ल्याखं महासंघयाके जक दयाच्वंगु थ्व अधिकार परिसंघयात नं बिउगु खः ।
