संविधान निर्माण प्रकृया न्ह्याकेत स्वंगू दल सहमत
ताः ईया दिपा लिपा प्रमुख स्वंगू दलत संविधान निर्माण प्रकृयायात न्ह्याकेत सहमत जूगु दु । संविधानसभा अधयक्ष सुवासचन्द्र नेम्वाङ नाप बुधवाः सुथय् जूगु खँल्हाबंलाय् स्वंगू दलया शीर्ष नेतातय्सं संविधान निर्माण प्रकृयायात निरन्तरता बीगु प्रतिबद्धता प्वंकूगु खः । नेतात दथुइया सहलहलय् संविधान निर्माणया कार्यतालिका दयेकाः न्ह्याः वनेगु सहमति जूगु दु ।
सहलह लिपा संविधानसभा अध्यक्ष नेम्वाङं नेतात संविधान निर्माणया कार्यतालिका दयेकेत, राज्य पुनःसंरचना आयोग गठन यायेत व दलत दथुइ असहमतिया बुँदायात प्याकेजय् सहमति यायेत सहमत जूगु खँ कनादिल ।
दलत दथुइ संविधान निर्माणया प्रकृया न्ह्याकेगु बारे आन्तरिक सहलह यानाः आइतवाः हानं नेम्वाङ सहित स्वंगू दलया नेतातय् बैठक च्वनीगु जूगु दु । बैठकय् माओवादी अध्यक्ष पुष्पकमल दाहाल 'प्रचण्ड', कांग्रेस संसदीय दलया नेता रामचन्द्र पौडेल, एमाले अध्यक्ष झलनाथ खनाल नापं स्वंगूलि दलया प्रमुख सचेतकतय् उपस्थिति दुगु खः ।
