प्रमया राजीनामा बिना बजेट व नीति व ज्याझ्वः पारित जुइमखु : माओवादी
प्रमुख विपक्षी दल एकीकृत नेकपा (माओवादीं) प्रधानमन्त्री माधवकुमार नेपालया राजीनामा बिना सरकारयात बजेट व नीति व ज्याझ्वः ह्येमबीगु खँ धाःगु दु । माओवादी पोलिटब्यूरो बैठकय् न्ववापिं दुजःतय्सं प्रधानमन्त्रीया राजीनामा बिना बजेट व नीति व ज्याझ्वः ह्येमबीगु खँ धाःगु दु ।
बैठक लिपा पार्टी उपाध्यक्ष नारायणकाजी श्रेष्ठ 'प्रकाशं' प्रधानमन्त्रीया राजीनामा व जेठ १४ गते जूगु सहमति कार्यन्वयनया लागिं संसद दुने पाखें हे सशक्त संघर्ष यानायंकीगु धयादिसें उकीया निंतिं नीति व ज्याझ्वः नापं बजेट ह्येमबीगु धयादिल ।
येँया कोटेश्वर पेरिस डाँडा स्थित माओवादीया मू ज्याकूथी जुयाच्वंगु बैठकय् न्ववापिं अधिकांश दुजःतय्सं संसदय् दकलय् तःधंगु दल माओवादी जूगुलिं माओवादीया हे नेतृत्वय् न्हूगु सरकार गठन यायेमाःगु बिचाः प्वंकूगु जानकारी बियादिसें प्रकाशं माओवादी दुने सुया नेतृत्वय् सरकार गठन यायेगु बारे विवाद मदुगु दाबी यानादिल ।
छवाः न्ह्यः निसें न्ह्यानाच्वंगु माओवादी पोलिटब्यूरो बैठकय् मंगलवाः दक्वं दुजःतय्सं पार्टी अध्यक्ष पुष्पकमल दाहाल 'प्रचण्ड'या राजनीतिक प्रतिवेदनय् न्ववायेगु ज्या क्वचाःगु दु । कन्हय् माओवादी अध्यक्ष प्रचण्डं दुजःतय्सं न्यंगु न्ह्यसःया लिसः बियादीगु ज्याझ्वः दुसाः दुजःतय् सुझाव सहित प्रतिवेदन पारित याइगु ज्याझ्वः नं दु ।
