कांग्रेसं सरकार नेतृत्वया जिम्मेवारी कायेमज्यू : सुजाता
न्हूम्ह प्रधानमन्त्री पौडेल : सिंह
उपप्रधानमन्त्री नापं कांग्रेस नेतृ सुजाता कोइरालां आः हे कांग्रेसं सरकारया नेतृत्व यायेमज्यूगु खँ धयादीगु दु । वय्कलं कांग्रेस व कांग्रेस प्रजातान्त्रिक पार्टी दथुइ एकीकरण जुसां निगू पार्टी भावनात्मक रुपं एकता जुइमफुगु स्वीकार यानादिसें पार्टी दुने थंज्याःगु गुटबन्दी कायम हे जूगु इलय् सरकारया जिम्मेवारी कायेगु उपयुक्त मजुइगु धयादिल ।
नेपाली कांग्रेसया वरिष्ठ नेतात कांग्रेसया हे नेतृत्वय् न्हूगु सरकार गठन यायेगु तयारीलय् लगे जुयाच्वंगु इलय् रिपोटर्स क्लबं मंगलवाः येँय् याःगु साक्षात्कार ज्याझ्वलय् कोइरालां पार्टीया महाधिवेशन न्ह्यः हे कांग्रेसं सरकारया नेतृत्व मयाइगु धयादिल ।
वय्कलं देशय् शान्ति व संविधान निर्माण यायेत सक्षम पार्टी कांग्रेस जक जूगु धयादिल । वय्कलं वर्तमान सरकार क्वथलाः न्हूगु सरकार गठन जुसां राजनीतिक स्थायीत्व कायम जुइमफइगु दाबी नं यानादिल ।
थ्वहे दथुइ मंगलवाः हे येँय् जूगु मेगू छगू ज्याझ्वलय् कांग्रेस महामन्त्री प्रकाशमान सिंह आः न्हूगु सरकारया नेतृत्व पार्टी संसदीय दलया नेता रामचन्द्र पौडेलं याइगु दाबी यानादीगु दु । वय्कलं पार्टी वरिष्ठ नेता शेरबहादुर देउवां याःगु सभासद्तय् भेलाया औचित्य मदुगु धयादिसें पौडेलयात प्रधानमन्त्री जुइत सुनां नं पनेमफइगु धयादिल ।
