जापानी राजदूतं प्रधानमन्त्री नेपाल नापलात
कार्यवाहक जापानी राजदूत ताडासी फुजिवारां मंगलवाः प्रधानमन्त्री माधवकुमार नेपालयात नापलाना नेपाः व जापान दथुइया स्वापु, द्विपक्षीय हित लगायत नेपाःया लिप्पांगु राजनीतिक अवस्थाया बारे खँल्हाबंला यानादीगु दु ।
सिंहदरवार स्थित प्रधानमन्त्रीया ज्याकूथीइ जूगु खँल्हाबंलाय् प्रधानमन्त्री माधवकुमार नेपालं नेपाःया शान्ति प्रकृया व संविधान निर्माण यायेगु ज्या क्वचायेकेत थः प्रतिबद्ध जूगु धयादिसें उकीयात याकनं निष्कर्षय् थ्यंकेत राजीतिक दलत दथुइ सहमति यायेत थम्हं कुतः यानाच्वंगु जानकारी बियादिल ।
उगु इलय् कार्यवाहक राजदूत फुजिवारां न्हूगु संविधान निर्माण लिपा नेपाः राजनीतिक स्थिरता व आर्थिक समृद्धि पाखेया न्हूगु युगय् प्रवेश याइगु विश्वास प्वंकादिल । वय्कलं नेपाःया शान्ति प्रकृयायात निष्कर्षय् थ्यंकेत व संविधान निर्माण यायेगु ज्याय् जापानं नेपाः सरकार व राजनीतिक दलयात निरन्तर ग्वाहालि यायेगु प्रतिबद्धता प्वंकादिल ।
