संचार माध्यम स्वयाः कार्यकर्ता निराश
येँ (सन्ध्या टाइम्स)/ एकीकृत माओवादीया नेतातय् दथुइ विवाद जुल धकाः ततःधंगु संचार माध्यमं खँ बय्बय् याःगुलिं पार्टीया कार्यकर्तात पत्रपत्रिका स्वयाः निराश जूगु दु ।
थौंकन्हय् पत्रपत्रिका जक मखु एफ एम नापं टेलिभिजन च्यानलतय्सं तकं माओवादी पार्टीया न्ह्यानाच्वंगु पोलिटब्यूरोया मुँज्याय् नेतातय्गु दथुइ तसकं बिवाद जुल धकाः समाचार बीगु खनाः व न्यनाः हीमी चायाः निराश जुयाच्वंगु दु। माओवादीया छम्ह जिल्लास्तरीय नेतां थःपिं नापं थःपिनि कार्यकर्तात लिपांगु इलय् वयाः निराश जूगु खः धकाः स्वीकार यानादीगु दु। वय्कलं अनिश्चितकालीन आमहडतालं हिउपाः वइ धकाः गुगु कथं आशा याःगु खः अथे मजुसे अःखतं आमहडतालयात हे लित कायेमाःगु, वंगु १४ गते चान्हय् 'थःपिंसं धाःसा तप्यंक हे संविधानसभाया म्याद थप यानाः नगद बीगु अले कांग्रेस एमालेयाके उधारों स्वंगू बुँदाया सहमति'याःगुलिं यानाः नं कार्यकर्तात निराश जूगु खः धकाः धयादिल ।
थःपिनिगु महान नापं गौरवशाली पार्टीया कार्यकर्तातय्त क्रान्ति लिक्क लिक्क थ्यन धकाः प्रशिक्षण बीगु अले संसदीय खेलय् फसे जुजुं वनाच्वंगुलिं अथे कार्यकर्तात जक निराश जूगु मखुसे नेतात नं निराश नापं स्वयं पार्टीया नायः प्रचण्डया ख्वालं नं उकिया संकेत बियाच्वंगु दु धकाः नं वय्कलं धयादीगु दु ।
