नेवाः 'दलित' बारे सहलह
येँ (सन्ध्या टाइम्स)/नेवाः समुदाय दुने नं दलित जाति दु धकाः सरकारं तयार यानाः व्यवस्थापिका संसदय् न्ह्यब्वयातःगु विधयेकयात कयाः कन्हय् सरोकारवालातय् दथुइ तःजिक सहलह यायेत्यंगु दु ।
नेवाः देय् दबूया ग्वसालय् जुइगु उगु सहलह मुँज्याय् नेवाः दुनेया दलित जाति धकाः विधेयकय् न्ह्यथनातःगु जातीय संगठनया प्रतिनिधि नापं नेवाः आन्दोलनया न्ह्यलुवातय्सं ब्वति कयादी। सरकारं न्ह्यब्वःगु विधेयकय् नेवाः दुनेया दलित जाति धकाः न्यागू जातियात दलितया धलखय् दुथ्याकातःगु दु। कपाली, कुस्ले, खड्गी, नाय्, पोडे व च्यामे जातीय समुदाययात दलितया धलखय् दुथ्याका तःगु खः ।
