राष्ट्रिय सहमति लिपा जक राजीनामा : पोखरेल
नेकपा (एमाले)या महासचिव इश्वर पोखरेलं शान्ति प्रकृया नाप स्वानाच्वंगु मद्दाय् राष्ट्रिय सहमति जुइधुंका जक प्रधानमन्त्रीं राजीनामा बीगु खँ धयादीगु दु । वय्कलं राष्ट्रिय सहमति निर्माण यायेत न्हापा माओवादीं शान्ति प्रकृया व न्हूगु संविधान जारी यायेगु विषयलय् प्रतिबद्धता प्वंकेमाःगु धयादिल ।
प्रेस चौतारी नेपाल रुपन्देही शाखां मंगलवाः बुटवलय् ग्वसाःग्वःगु पत्रकार सम्मेलनय् वय्कलं राष्ट्रिय सहमतिया निंतिं माओवादीं कब्जा यानातःगु छेँबुँ लितबीमाःगु, वाईसीएलया अर्धसैन्य संरचना भंग यायेमाःगु, समायोजन जुइगु लडाकुया ल्या: क्वःछीमाःगु व माओवादी नागरिक पार्टीलय् रुपान्तरण जुइमाःगु धयादिल ।
झिंनिगु बुँदे सहमतिया आधारय् माओवादी शान्ति प्रकृयाय् वःगु ख:सां माओवादीं सहमति कार्यान्वयन मयागुलिं दलत दथुइ विश्वासया संकट वःगु धयादिल । वय्कलं माओवादीं सहमति पालना यानाः विश्वासया वातावरण मदयेकु तल्ले सरकारया नेतृत्व माओवादीं यायेमदइगु धयादिल ।
