'माओवादी नागरिक पार्टी मखु धकाः गुकथं धायेगु?'
भारतीय नेता डिपी त्रिपाठीं सरकारया नेतृत्व यायेधुंकूगु एनेकपा (माओवादी)यात गुकथं नागरिक पार्टी मखु धायेगु धकाः न्ह्यसः तयादीगु दु । नेपा:या प्रमुख राजनीतिक दलतय्सं माओवादीयात ल्वाभ: व लडाकु पाखें अलग जुइधुंका व वाइसीएलया अर्ध सैन्य संरचना भंग यायेधुंका जक नागरिक पार्टी जुइगु धयाच्वंगु इलय् वय्कया थंज्या:गु धापू सार्वजनीक जूगु ख: ।
बलिउड हिरोइन मनिषा कोइरालाया ईहिपा भ्वजय् ब्वति कायेत नेपाः झायादीम्ह भारतीय राष्ट्रवादी कांग्रेसया महामन्त्री त्रिपाठीं सोमवाः येँय् जूगु छगू अन्तर्त्रियाय् न्ववानादिसें संविधानसभाया दकलय् तःधंगु दल नापं सरकारया नेतृत्व यायेधुंकूगु छगू दल व शान्ति प्रकृयाया छगू महत्वपूर्ण पक्ष माओवादीयात गुकथं नागरिक पार्टी मखु धायेगु धयादिल ।
भारतं नेपाःया मामिलाय् हस्तक्षेप मयाइगु धयादिसें वय्कलं लडाकु व्यवस्थापन व पुनर्स्थापनाया खँ नेपाःया दलत दथुइ सहमतिया आधारय् हे यायेमाःगु धयादिल । वय्कलं नेपाः व भारत दथुइ १९५०य् जूगु लगायत मेगू सन्धि सम्झौता पुनारवलोकन यायेत थःगु दलं ग्वाहालि यायेगु धयादिल ।
त्रिपाठी नापं भ्वजय् ब्वति कायेत झायादीम्ह भारतीय समाजवादी पार्टीया उपाध्यक्ष एच. एन. शर्मां नेपालय् शान्ति जुसाः जक भारतय् नं शान्ति जुइगु धयादिल । वय्कलं नेपाःया राजनीतिक पार्टीत मिले जुसाः जक प्रजातन्त्रया संरक्षण जुइगु धयादिसें राष्ट्रिय मुद्दाय् दक्वं मिले जुयाः ज्या यायेमाःगु खँय् बः बियादिल ।
