'झिंनिगू स्वायत्त प्रदेश जक यायेमाः'
येँ (सन्ध्या टाइम्स)/राजनीतिक विश्लेषक डा. कृष्ण हाछेथुं राज्य पुनर्संरचना यायेगु झ्वलय् झिंप्यंगू मखु झिंनिगू जक स्वायत्त प्रदेश दयेकेमाः धयादीगु दु ।
संविधानसभाया राज्य पुनर्संरचना समितिं तयार याःगु झिंप्यंगू स्वायत्त प्रदेश मध्ये जडान व शेर्पा प्रदेश खारेज यायेमाःगु बिचाः वय्कलं प्वंकादीगु दु ।
'सन्ध्या टाइम्स'लिसे खँ ल्हासें वय्कलं नारायणी व सुनकोशी प्रदेश धाःसा यथावत तयातयेमाःगु खँ नं कनादिल। संविधानसभाया राज्य पुनर्संरचना समितिइ नेपाःया कुल जनसंख्याय् १ प्रतिशत दुगु आदिवासी जनजाति, भाषाभाषी नापं समुदाययात स्वायत्त प्रदेश दयेकेगु धकाः सहमति जूसां लिपा वनाः १ प्रतिशत जनसंख्या हे मदुगु शेर्पायात नापं जडान प्रदेश दयेकेगु धकाः प्रस्ताव हःगु पाय्छि मजूगु खँ वय्कलं धयादिल ।
संविधानसभाया राज्य पुनर्संरचना समिति अन्तर्गत उपसमितिं झिंनिगू स्वायत्त प्रदेशयात जक प्रस्ताव तःगु तर निन्हु स्वन्हु लिपा हे जडान व शेर्पा प्रदेश दुथ्याकाः झिंप्यंगू प्रदेश प्रस्ताव हःगु पाय्छि मजू धकाः नं वय्कलं धयादिल। डा. हाछेथुं आः हःगु नारायणी प्रदेश व सुनकोशी प्रदेशय् अप्वः यानाः खय् ब्रम्हूत दुगु अले नेपाःया जनसंख्याय् ब्रम्हूत १२ प्रतिशत नापं ब्रम्हू सिबें नं अप्वः दुगु क्षेत्रीतय्त कःघायेगु कथं नारायणी व सुनकोशी प्रदेश यथावत हे तयेमाः धकाः नं धयादिल। स्वायत्त प्रदेशं कःघाये मफुगु जाति, जनजाति व समुदायया निंतिं स्वायत्त संरक्षित क्षेत्रत विकास यायेमाःगु अवधारणा नं वय्कलं न्ह्यःने तयादीगु दु ।
