मोहनविक्रमं आर्चाय व न्यौपानेयात पितिन
येँ (सन्ध्या टाइम्स)/भूमिगत जुयाच्वंगु पार्टी नेकपा (मसाल)या पोलिटब्यूरो दुजः डिलाराम आचार्य व केन्द्रीय दुजः गिरधारीलाल न्यौपानेयात पार्टीया दुजः तकं मजुइकथं निलम्बन याःगु दु ।
पार्टी दुने गुटबन्दी याःगु द्वपं बियाः वय्कःपिंत खुला तकया नितिं निलम्वन याःगु खः। आचार्य मसालया वैधानिक मोर्चा राष्ट्रिय जनमोर्चाया महासचिव खः ।
आचार्य व न्यौपाने लिपांगु इलय् वयाः दच्छि न्ह्यःनिसें हे सरकार व माओवादीयात स्वयेगु दृष्टिकोणयात कयाः पार्टी दुने ब्यागलं कथंया धार तया वयाच्वंपिं खः ।
अन्तर्संघर्ष तच्वयावंलिसे वय्कःपिंसं ब्यागलं कथंया भेला यानाः कारबाही यायेत महामन्त्री मोहनविक्रम सिंहयात हाथ्या बिया वयाच्वनादीगु खः। वय्कःपिंसं नं पार्टी दुने संयन्त्र दयेके धुंकूगु दु ।
आचार्यं 'सन्ध्या टाइम्स' लिसे खँ ल्हासें मसाल पार्टीं कारवाही याःगु थम्हं मसिउ तर पार्टी दुने सरकार व माओवादीयात स्वयेगु दृष्टिकोण थःपिनिगु पानाच्वंगु खः धयादिसें मसाल धइगु न्हापांनिसें हे एकचिन्ते पार्टी खः धयादिल ।
