पत्रकारिता व उद्घोषण तालिम
य ल(सन्ध्या टाइम्स)/नेवाः प्रेस दबू नेपाःया ग्वसालय् जूगु सञ्चार व पत्रकारिता तालिमया उलेज्या शनिवाः जुल। मू पाहां प्रेस दबूया सल्लाहकार मोतिलाल शिल्पकारं त्वाःदेवा च्याकाः तालिम उलेज्या यानादीगु खः ।
ज्याझ्वलय् नेवाः देय् दबूया नायः नरेश ताम्राकार, प्रभात रिमाल, सुरेश खड्गी आदिपिंसं सञ्चार व पत्रकारिताया विषयय् नुगःखँ प्वंकादीगु खः ।
नरेन्द्र श्रेष्ठया सभापतित्वय् जूगु उगु ज्याझ्वलय् प्रेस दबूया छ्यांज्ये विनोद रंजितकारं लसकुस यानादीगु खः। तालिमय् नीनिम्ह प्रशिक्षार्थीतय्सं ब्वति कयाच्वंगु दु ।
थ्वहे झ्वलय् मेखे कन्द्रीय मानन्धर संघपाखें मानन्धर समाजया मस्तय् लागिं उद्घोषण तालिम शुरु याःगु दु। येँया क्षेत्रपाटीस्थित संघया थःगु हे ज्याकुथी न्ह्यानाच्वंगु उगु तालिमय् झिंनिम्ह मस्तय्सं ब्वति कयाच्वंगु दु। ज्याझ्वः मानन्धर संघया मिसा सीप विकास तालिम उपसमितिया ग्वसालय् जूगु खः ।
