पुलांम्ह कुमारी माजुपाखें कुमारी संस्कृतिया सफू विमोचन
येँ (सन्ध्या टाइम्स)/निवर्तमान कुमारी मय्जु प्रीति शाक्य व संस्कृति मन्त्री डा. मिनेन्द्र रिजालं कुमारी संस्कृति सम्बन्धी छगू सफूया मंकाः कथं विमोचन यानादिल ।
कुमारी छेँय् हे च्वनादीम्ह मय्जु दुर्गा शाक्यं च्वयादीगु 'हाम्रो संस्कृतिमा देवी तुलजा र कुमारीको स्थान' सफू वय्कःपिंसं विमोचन यानादीगु खः ।
खस नेपाली भासं च्वयातःगु उगु सफुली तलेजु माजु व कुमारी माजुया स्वापू नापं कुमारी छेँया बारे आपालं महत्वपूर्ण खँत दुथ्यानावंगु दु। मय्जु दुर्गा शाक्यं आपालं खोज यानाः उगु सफू तयार यानादीगु खः।
सफूयात कयाः कुमारीया हे विषयय् विद्यावारिधी यानादीम्ह डा. रमा पाण्डें समीक्षा यानादीगु खः ।
जेसीआई काठमाडौं लेडी नेपालया ग्वसालय् जूगु उगु ज्याझ्वलय् काठमाडौं लेडीया नायः शान्तितारा मानन्धरं लसकुस यानादीगु खःसा तोखा व किलागःया कुमारी नापं गणेश नं बिज्याःगु खः ।
