जनता निराश जुल : नेम्वाङ
संविधानसभाया अध्यक्ष सुवासचन्द्र नेम्वाङं राजनीतिक दलत दथुइ जुयाच्वंगु विवादया कारणं जनता निराश जूगु खँ धयादीगु दु । वय्कलं प्रमुख राजनीतिक दलतय्सं सहमति कार्यान्वयन मयानाः हे जनताय् ब्वलनाच्वंगु निराशा अप्वयावंगु धयादिल ।
सामुदायिक रेडियो प्रसारक संघया राष्ट्रिय सम्मेलनया सोमवाः येँय् उल्लेज्या यानादिसें वय्कलं प्रमुख राजनीतिक दलत दथुइ सेना समायोजन व व्यवस्थापन बारे खँ मिलेमजूगुलिं जेठ १४या सहमति कार्यान्वयन जुइमफुगु धयादिल । वय्कलं थुकीया बारे याकनं सहमति यायेत दलतय्त इनाप नं यानादिल ।
वय्कलं राजनीतिक सहमति व उकीया कार्यान्वयन पक्षया खँय् बः बियादिसें राजनीतिक सहमति जुसाः संविधानसभाया थप याःगु ई स्वयां न्ह्यः हे संविधान निर्माण यायेफइगु दाबी यानादिल ।
एनेकपा (माओवादी)या प्रवक्ता दिनानार्थ शर्मां देशय् गणतन्त्र पलिस्था यायेत पत्रकारतय्सं महत्वपूर्ण भूमिका म्हितुगु धयादिसें गणतन्त्र संस्थागत यायेत नं पत्रकारतय् भूमिका उलि हे महत्वपूर्ण जुइगु धयादिल
ज्याझ्वलय् नेपाल पत्रकार महासंघया अध्यक्ष धर्मेन्द्र झां नं थःगु नुगः खँ प्वंकादीगु खः ।
