'ल्वाभः व सेना पाखें अलग मजूगुलिं माओवादीयात विश्वास याये थाकुल'

नेकपा (एमाले)या महासचिव इश्वर पोखरेलं माओवादी ल्वाभः व सेना पाखें अगल मजूगुलिं वयात विश्वास यायेमफुगु खँ धायदीगु दु । वय्कलं माओवादी पाखें ल्वाभः अलग मयासाः दच्छिया दुने नं संविधान च्वयेमफइगु धयादिसें माओवादीयात नागरिक पार्टीलय् रुपान्तरण जुइत इनाप यानादिल ।

तेह्रथुमय् आइतवाः जूगु एमाले काशी अञ्चल समन्वय कमिटीया बैठकय् न्ववानादिसें पोखरेलं माओवादीं शान्ति प्रकृया नाप स्वाःगु मुद्दायात सम्बोधन यायेगु ई तोके यानाः प्रतिबद्धता प्वंकूसाः प्रधानमन्त्री माधवकुमार नेपाल राजीनामा बीत तयार जूगु धयादिल ।

माओवादीया युवा दस्ता वाईसीएलया अर्धसन्य संरचना भंग नाप शिविरय् दुपिं लडाकुतय् समायोजन यायेत माओवादी तयार जुसाः न्हूगु राष्ट्रिय सहमतिय सरकारया निंतिं प्रधानमन्त्री माधवकुमार नेपाल बाधक मजुइगु धयादिल ।