खेलकुद परिषदय् तोडफोड
येँ (सन्ध्या टाइम्स)/करारय् नियुक्त याना तःपिं प्रशिक्षकतय्सं थौं खेलकुद परिषद्य् तोडफोड याना बिल। थःपिंत तःदँ तक करारय् तयाः नं स्थायी नियुक्ति धाःसा मयाः धासें प्रशिक्षकतय्सं थौं खेलकुद परिषद्या पदाधिकारीत च्वनीगु क्वथाय् वनाः तोडफोड याःगु खः ।
करारय् नियुक्त प्रशिक्षकतय्सं थःपिंत स्थायी यायेमाल धइगु माग यासें परिषद्यात ज्ञापनपत्र बियातःगु खः। तर परिषदं उकियात वेवास्ता याःगुलिं थौं प्रशिक्षकत मुनाः उगु तोडफोड याःगु खँ धाःगु दु ।
उमिसं फुक्कं पदाधिकारीतय् क्वथाय् तालं नं ग्वया बिउगु खः। थःपिनि माग पूमवंतले ताः चायेकेगु मखु धकाः लगे जुयाच्वंपिं प्रशिक्षकतय्सं थःपिंलिसे पदाधिकारीतय्सं वार्ता याः मवः धासें तोडफोड समेत याःगु खः ।
उगु तोडफोडं यानाः खेलकुद परिषद्य् तनाव ब्वलनाच्वंगु दु।
थःपिनि माग पूरा मयात धाःसा छसिकथं आन्दोलन याना वनेगु खँ नं आन्दोलनरत प्रशिक्षकतय्सं जानकारी बिउगु दु ।
