माओवादी सरकार न्हूगु संविधान दयेकेत अनइच्छुक : कोइराला
नेपाली कांग्रेसया सभापति गिरिजाप्रसाद कोइरालां माओवादी नेतृत्वया सरकार न्हूगु संविधान दयेकेत अनइच्छुक दुगु खँ कनादीगु दु ।
बिहिवाः सुथय् अन्तर्राष्ट्रिय समाज सहयोग विकास मन्त्री माइक फोस्टर नापया खँल्हाबंलाया झ्वलय् वयेकलं माओवादी सरकार न्हूगु संविधान च्वयेगु सिवें मेमेगु गतिविधि अप्व ध्यान वियाच्वंगु खँ धयादीगु दु । वयेकलं अदालतया ज्याया नापं देया प्रमुख अङ्गया विरोध यासें माओवादीं अप्वयेका च्वंगु अपराधीक गतिविधि प्रति चिन्ता प्वंकादिल ।
कोइरालानापया खँल्हाबंलालिपा बेलायती मन्त्री फोस्टरं संविधान निमार्ण ज्याय् व शान्ति प्रकृयाय् नेपाली कांग्रेसया भुमिकाबारे जिज्ञासा तयादीगु खँ कनादिल । वयेकलं अनमिनया समायावधी तनेगु वा मतनेगु बारे नेपाली कांग्रेसया बिचाः न न्यनादिल ।
अथेहे मन्त्री फोस्टरं बिहिवाः हे गृहमन्त्री बामदेव गौतमयात नं नापलाना सुरक्षा स्थितिबारे जानकारी कयादीगु दु ।
