एनओएपाखें जगतसुन्दरया झिम्ह विद्यार्थी प्रायोजन
येँ (सन्ध्या टाइम्स)/अमेरिकाय् च्वंपिं नेवाःतय्सं चायेकातःगु संस्था नेवाः अर्गनाइजेशन अफ अमेरिका (एनओए) पाखें नेपालभाषां आखः ब्वंकीगु नेपाःया छगूयां छगू जक स्कूल जगत सुन्दर ब्वनेकुथिया झिम्ह विद्यार्थीतय्त प्रायोजन याइगु जूगु दु। थुकिया लागिं माःगु आर्थिक व्यवस्था मेगु लाय् जुइगु खँ नं धाःगु दु ।
एनओपाखें नेवाः भाय्, नेवाः संस्कृतियात मचांनिसें हे नेवाःतय् नुगलय् स्वचाके धइगु थःपिनि ताः कथं थ्व प्रायोजन याःगु खः। सन् २००९ या मईनिसें थ्व प्रायोजन शुरु यानाः २०११ या मई तकया दुने झिम्ह मस्तय्त प्रायोजन यायेगु ताः एनओएं तःगु खःसां लक्ष्य स्वयां दछि न्ह्यः हे थ्व प्रायोजन यायेत थःपिं ताःलाःगु खँ एनओएं धाःगु दु ।
एनओएपाखें आकिवं तकया दुने मेपिं न्याम्ह विद्यार्थीतय् लागिं प्रायोजनया व्यवस्था यायेगु ताः तयागु खँ नं धाःगु दु।
मेगु लाय् एनओएया नायः भाजु राजेश श्रेष्ठ नेपाः झाइगु ग्वसाः दुगु खँ नं सीदुगु दु ।
