हल्ला जू थें आर्थिक संकट मदु: गभर्नर खतिवडा
येँ (सन्ध्या टाइम्स)/पिने गुकथं खँ पिहां वयाच्वंगु खः उकथंया आर्थिक समस्या देशय् मजूगु खँ नेपाल राष्ट्र बैंकया गभर्नर डा. युवराज खतिवडां धयादीगु दु। वय्कलं आर्थिक वृद्धिदर ४, औद्योगिक उत्पादन ३ दशमलव ५ व मूल्यवृद्धि १० अंकं कुहां वयेवं बजारय् गुगु आर्थिक संकट वल धइगु खँ पिहां वयाच्वंगु दु उकियात कयाः चिन्ता कायेमाःगु आवश्यकता मदुगु खँ नं धयादीगु दु ।
नेपाल राष्ट्र बैंक कर्मचारी संघया स्वन्हुयंकंया केन्द्रीय परिषद् बैठकया उलेज्या यासें गभर्नर खतिवडां थुगु दँय् आर्थिक वृद्धिदर कुहां वःगु व वस्तु निर्यातय् नं समस्या खने दयाच्वंगु खःसां सेवा निर्यात अप्वया वनाच्वंगु जानकारी बियादिसें बैंकिङ्ग क्षेत्रय् तरलताया अभावया कारणं धाःसा अर्थतन्त्रय् समस्या जूगु स्वीकार यानादीगु दु ।
भुक्तानी सन्तुलनय् द्यापं फये मालेवं देशं हे द्यापं फयेमाल धकाः बिचाः यायेगु पाय्छि मजूगु टिप्पणी यासें वय्कलं नेपाली मुद्राया रेमिट्यान्सय् १० प्रतिशतं थहां वंगु, विदेशी सञ्चित मुद्रा न्हापा स्वयां कुहां वनाच्वंगु खःसां आः हाकनं थहां वनेगु क्रम न्ह्यानाच्वंगु दावी नं यानादिल ।
