प्रधानमन्त्री व उपराष्ट्रपति दथुइ खँल्हाबंला

प्रधानमन्त्री माधवकुमार नेपाल व उपराष्ट्रपति परमानन्द झा दथुइ आइतवाः न्हिनय् खँल्हाबंला जूगु दु । वय्कपिं दथुइ वर्तमान राजनीतिक अवस्था, संसदया न्हूगु अधिवेशन, सरकारं संसदय् न्ह्यब्वइगु नीति व ज्याझ्वः नापं न्हूगु आर्थिक दँया बजेटया बारे खँल्हाबंला जूगु खः ।

उपराष्ट्रपति झा नापया खँल्हाबंलाय् प्रधानमन्त्री नेपालं सरकारं संसदय् न्ह्यब्वयेत तयार यानाच्वंगु न्हूगु आर्थिक दँया बजेट नापं नीति व ज्याझ्वःया बारें झायात जानकारी बियादीगु खः । अथेहे राजनीतिक गतिरोध ज्यंकेत लिप्पांगु इलय् जुयाच्वंगु सहमतिया कुतः व लिप्पांगु परामर्शया बारे कनादीगु खः ।

उगु इलय् उपराष्ट्रपति झां राजनीतिक दलतय्सं सहमति यानाः न्ह्याः वनीगु बारे थ: विश्वस्त जूगु खँ धयादीगु खः ।