सहमति कार्यान्वयनय् इमान्दार जुइत प्रचण्डया इनाप
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' सहमति कार्यान्वयनय् इमान्दार जुइत कांग्रेस व एमालेयात इनाप यानादीगु दु । वय्कलं स्वंगू बुँदे सहमतिया कार्यान्वयन नापं गतिरोध क्वचाइगु विश्वास प्वंकादिल ।
आइतवाः येँय् 'डिपन' पत्रिकाया विमोचन यानादिसें वय्कलं संविधानसभाया निर्वाचनया परिणाम कथं सहमति जुइमाःगु खँय् बः बियादिसें निर्वाचनया परिणाम कथं माओवादी तःधंगु दल जूगुलिं सहमतिलय् हे न्हूगु सरकारया नेतृत्व स्वतः माओवादीयात दइगु धयादिल ।
अझ नं सहमतिया निंतिं दलत नाप अनौपचारिक रुपं सहलह जुयाच्वंगु धयादिलसें वय्कलं अज्याःगु अनौपचारिक वार्तां सहमति जुसाः प्रकृया पूवंकेत औपचारिक वार्ता यायेगु धयादिल । माओवादीया न्ह्यानाच्वंगु पोलिटब्यूरो बैठकय् नं राजनीतिक निकासया निंतिं गम्भीर रुपं सहलह जुयाच्वंगु व बैठकया अन्त्यय् छगू निकास पिहांवइगु धयादिल ।
