थ्व केयरटेकर सरकार जक खः ला? - प्रम
वर्तमान सरकारया हैसियतया बारे थीथी ख्यलं बिस्कं बिस्कं बिचाः पिहांवयाच्वंगु इलय् प्रधानमन्त्री माधवकुमार नेपालं थःगु नेतृत्वया सरकार केयरटेकर जक खः ला धकाः कानुन व्यवसायीतय्त न्ह्यसः तयादीगु दु ।
थःगु हे पार्टीया नेतातय्सं वर्तमान सरकारयात केयरटेकर जक जूगु खँ धयाच्वंगु इलय् शनिवाः प्रधानमन्त्री नेपालं छथ्वः कानुन व्यवसायीत नाप सहलह यानादिसें थंज्याःगु न्ह्यसः तयादीगु खः । उगु इलय् कानुन व्यवसायीतय्सं संविधानसभा पाखें हे गठन थुगु सरकार केयरटेकर मजूगु खँ धाःगु खः ।
राजनीतिक सहमतिं सरकारया वैधानिक हैसियतय् छुं लिच्वः मलाःगुलिं सरकारयात ढुक्क जुयाः ज्या यायेत सुझाव ब्यूसे उमिसं केयरटेकर धयाः सरकारयात कमजोर दयेकेमज्यूगु बिचाः प्वंकूगु खः ।
अथेहे सहलहया झ्वलय् न्हूगु आर्थिक दँया बजेटया बारे नं सहलह जूगु खः । सहलहलय् कानुन व्यवसायीतय्सं न्हूगु बजेट पेश यायेगु इलय् सरकारं राजीनामा बीमज्यूगु खँ धासें थुगु इलय् सरकारं राजीनामा ब्यूसाः देय् झन् संकट व अराजकताय् वनेफुगु पाखे प्रधानमन्त्रीया ध्यानाकर्षण याःगु खः ।
