सहमति कार्यान्वयन यायेत नेम्वाङया इनाप
संविधानसभाया अध्यक्ष सुवासचन्द्र नेम्वाङं जेठ १४ गते जूगु सहमति कार्यान्वयन यायेत इनाप यानादीगु दु ।
धर्मोदय सभां शनिवाः येँय् ग्वसाःग्वःगु बृहत बौद्धसभाया उल्लेज्या यानादिसें वय्कलं स्वंगू बुँदे सहमति कार्यान्वन यानाः शान्ति प्रकृया व संविधान च्वयेगु आधार तयार यायेत प्रमुख स्वंगू दलयात इनाप यानादिल । वय्कलं दलतय्सं सहमति कार्यान्वयन यायेमफुसाः दच्छिया निंतिं थप याःगु संविधानसभां नं न्हूगु संविधान निर्माण यायेमफइगु धयादिल ।
वय्कलं संविधानया अभावय् गणतन्त्र व धर्मनिरपेक्षता संस्थागत जुइमफु धयादिसें संविधानया निंतिं थम्हं न्हय्लाया कार्यतालिका दयेकाःगु खँ धयादिल । दलत छप्पँ जुया संविधान निर्माण यायेगु ज्याय् गम्भीर जुसा: न्हय्लाया दुने संविधान निर्माण यायेफइगु दाबी यानादिल ।
ज्याझ्वलय् माओवादी नेता सुरेश आलेमगर, कांग्रेसया आनन्दप्रसाद ढुंङ्गेल व एमाले नेता भरतमोहन अधिकारीं दक्वसिनं त्याग यानाः शान्ति व संविधान निर्माण यायेगु खँय् छप्पँ जुइमाःगु खँ धाःगु खः ।
