'थ्व सरकारया आयु सिधेधुंकल'
सत्ता नेतृत्व यानाच्वंगु नेकपा (एमाले)या अध्यक्ष झलनाथ खनालं वर्तमान सरकारया आयु सिधेधुंकूगु खँ धयादीगु दु ।
खनाल निवास डल्लुइ शनिवाः रिपोर्टस क्लवं याःगु साक्षात्कार ज्याझ्वलय् खनालं थ्व सरकार संवैधानिक रुपं कामचलाउ सरकार जुसां राजनैतिक रुपं कमजारे जुयावंगु धयादिल । खनालं वर्तमान सरकारं शान्ति व संविधान निर्माण यायेमफुगु यथार्थयात स्वीकार यायेमाःगु धयादिल ।
वय्कलं आः याकनं हे न्हूगु राष्ट्रिय सरकार गठन जुइगु धयादिसें न्हूगु सरकारया प्रधानमन्त्री संसद पाखें बहुमत प्राप्त याःसा न्ह्याम्ह नं जुइफइगु धयादिल । वय्कलं माओवादी अध्यक्ष प्रचण्ड नं प्रधानमन्त्री जुइफइगु तर उकीया निंतिं माओवादी नागरिक पार्टीलय् रुपान्तरण जुइमाःगु धयादिल ।
प्रधानमन्त्री माधवकुमार नेपालया राजीनामाया बारे वय्क नाप सहलह मजूगु धयादिसें खनालं प्रधानमन्त्री नेपालयात शुक्रवाः राजीनामा बीगु पाखें थम्हं मपनाःगु धयादल । वय्कलं शुक्रवाः प्रधानमन्त्रीं राजीनामा बीगु धकाः च्वःगु संचार माध्यमं हे थुकीया बारे खण्डन यायेमाःगु धयादिल ।
