कांग्रेस पाखें माओवादीयात न्हूगु प्रस्ताव

नेपाली कांग्रेसं माओवादीं सहमति पालना याःसा कांग्रेसं तुरुन्त सरकारं पिहांवनेगु खँ धाःगु दु । माओवादी नापया लिप्पांगु सहलहया झ्वलय् कांग्रेसं माओवादी समक्ष अज्याःगु प्रस्ताव त:गु खँ कांग्रेस सभापति सुशील कोइरालां धयादीगु दु ।

शनिवाः येँय् जूगु छगू कार्यशालाया उल्लेज्या यानादिसें कोइरालां सहलहलय् माओवादीं सहमति पालना यायेधुंकाः प्रधानमन्त्रीं राजीनामा मब्यूसां कांग्रेस सरकारं पिहांवनीगु प्रस्ताव तयाःगु धयादिल । वय्कलं उगु सहलहलय् माओवादी अध्यक्ष प्रचण्ड व उपाध्यक्ष मोहन वैद्यया उपस्थिति दुगु जानकारी बियादिल ।

कांग्रेस सरकारं पिहांवनेवं राष्ट्रिय सहमतिया सरकारया लँपु चालीगु धयादिसें वय्कलं आः सहमति जुइगु वा मजुइगु खँ माओवादीया भूमिकाय् निर्भर जुइगु धयादिल ।