थौं नं प्रधानमन्त्री पाखें राजदूतत नाप खँल्हाबंला
प्रधानमन्त्री माधवकुमार नेपालं थौं नं नेपा:या निंतिं थीथी देय्या राजदूतत नापलना खँल्हाबंला यानादीगु दु । वय्कलं शुक्रवाः श्रीलंकाया राजदूत थोसापाला हेवागे, दक्षिण कोरियाया राजदूत होङ्ग सुङ्ग मोग व थाइल्यान्डया राजदूत मारिस सिङ्गयमापोङसा नाप निगू देय्या आर्थिक, समाजिक, सांस्कृतिक व व्यापारिक लगायत आपसी हितया विषयलय् खँल्हाबंला यानादीगु दु ।
खँल्हाबंलाय् प्रधानमन्त्री नेपालं जेठ १४ गते संविधानसभाया म्याद थप यायेधुंकाः शान्ति प्रकृयायात निष्कर्षय् थ्यंकेत व संविधान निर्माण यायेगु ज्याय् थम्हं यानाच्वंगु पहलया बारे जानकारी बियादीगु खः । वय्कलं उगु इलय् राजनीतिक दलत दथुइ सहमतिया निंतिं जुयाच्वंगु कुतःया बारे नं चर्चा यानादीगु खः ।
खँल्हाबंलाय् राजदूतय्तसं शान्ति प्रकृयाय् प्रधानमन्त्रीं यानाच्वंगु पहलया प्रशंसा यासें नेपालं शान्ति व संविधानया लक्ष्य याकनं पूवंना उकीं दिगो शान्ति, राजनीतिक स्थिरता व आर्थिक समृद्धिलय् ग्वाहालि जुइगु विश्वास प्वंकूगु खः ।
प्रधानमन्त्री नेपालं म्हिग चिनिया राजदूत क्यु गो होङ व पाकिस्तानी राजदूत सहिद अर्बर हुसेन नाप खँल्हाबंला यानादीगु खः ।
