प्रधानमन्त्रीया निंतिं दावी यायेमखु : भट्टराई
एकीकृत नेकपा (माओवादी)या उपाध्यक्ष डा. बाबुराम भट्टराईं आःया मू आवश्यकता राजनीतिक सहमति जूगु खँ धयादीगु दु । वय्कलं राजनीतिक सहमति हे आःया मू आवश्यकता जूगुलिं थम्हं प्रधानमन्त्रीया निंतिं दावी मयायेगु धयादिल ।
'राजनीतिक सहमति हे आःया आवश्यकता जूगुलिं दक्वसिनं थःथःगु हठ त्याग यायेमाः' वय्कलं धयादिल, 'उकीं जि बाबुराम भट्टराई प्रधानमन्त्रीया उम्मेदवार मजूगु जानकारी याये ।'
शुक्रवाः सुथय् येँया होटल मल्लय् जूगु छगू ज्याझ्वलय् वय्कलं प्रधानमन्त्रीया दावी यानाः सहलह याःगुलिं हे दलत दथुइ निष्कर्ष पिहांमवगु धयादिसें दक्वसियां अज्याःगु दावी त्याग यायेमाःगु धयादिल । वय्कलं थः शान्ति व संविधानया निंतिं प्रतिबद्ध जूगु व मेपिंत नं थुकी प्रतिवद्ध जुइत इनाप यानादिसें दक्वसिनं थःथःगु हठ त्याग यायेमाःगु खँय् बः बियादिल ।
प्रधामन्त्रीया निंतिं थः उम्मेदवार मजूइगु खँ धयादिसां नेता भट्टराईं शान्ति व संविधान निर्माणयात निष्कर्षय् थ्यंकेत माओवादीं सरकारया नेतृत्व यायेमाःगु धयादिल । वय्कलं पार्टी दुनें न्ह्याम्हेसिनं सरकारया नेतृत्व याःसां थम्हं ग्वहालि यायेगु प्रतिबद्धता प्वंकादिल ।
