सेना समायॊजन प्राविधिक समितिपाखें आचारसंहिता व कार्यविधि तयार

माओवादीया सेनाया लडाकुतय् रेखदेख, समायोजन व पुनः स्थापनाया निंतिं गठन जूगु विशेष समिति अन्तर्गतया प्राविधिक समितिं थःगु आचारसंहिता व कार्यविधि तयार याःगु दु ।

बुधवाः सनिलय् सिंहदरवारय् च्वंगु प्रावधिक समितिया बैठकं खुगू बुँदे आचारसंहिता तयार याःगु दु । आचारसंहिताय् समितिया दुजतय्सं राजनीतिक दलया शीर्ष नेतातनाप परामर्श यायेफइगु तर नेतातपाखें प्राप्त जानकारी सार्वजनिक याये मदइगु खँ न्ह्यथंनातःगु दु । समितिया दुजःतय्सं नेपाली सेना वा माओवादी सेनाया लडकुतय्त भड्के यायेगु वा उत्तेजित यायेगु कथंया मन्तव्य अन्तर्वार्ता व सार्वजनिक रुपं थःगु बिचाः प्वंके दइमखु ।

प्रावधिक समितियात स्वलाःया दुने सेना समायोजा सम्बन्धि प्रारुप तयार यायेमाःगु जिम्मेवारी बियातःगु दु । प्राविधिक समितिया मेगु बैठक बिहावाः च्वनी ।