प्रमपाखें चिनिया व पाकिस्तानी राजदूत नाप खँल्हाबंला
प्रधानमन्त्री माधवकुमार नेपालं चिनिया राजदूत क्यु गो होङ व पाकिस्तानी राजदूत सहिद अर्बर हुसेन नाप बिहीवाः खँल्हाबंला यानादीगु दु । निम्ह राजदूतनाप बिस्कं बिस्कं जूगु खँल्हाबंलाय् नेपाःया लिप्पांगु राजनीतिक अवस्था, शान्ति व संविधान लगायत विषयलय् खँल्हाबंला जूगु खः ।
चिनिया राजदूत क्यु नाप जूगु खँल्हाबंलाय् प्रधानमन्त्री नेपालं लोकतन्त्रय् दक्वसियां समान अस्तित्व दथुइगुलिं थः सुयां धम्की व आक्रोशया न्ह्यने क्वमछुइगु खँ धयादिल । वय्कलं सुनं दल नाप अर्ध सन्यै संरचना व ल्वाभः दुतल्ले लोकतन्त्रा बल्लाये मफइगु धयादिल ।
उगु इलय् क्युं चीनं न्ह्यावलें नेपालय् राजनीति स्थिरता, समृद्धि व शान्ति जूगु स्वये चाहे जूगु धयादिल । वय्कलं दलत दथुइ सहमति यानाः न्ह्याः वनेमाःगु धयादिसें नेपालय् याकनं शान्ति प्रकृया क्वचाइगु विश्वास प्वंकादिल ।
अथेहे बिहीवाः हे पाकिस्तानी राजदूत हुसेन नाप जूगु खँल्हाबंलाय् प्रधानमन्त्री नेपालं माओवादी लडाकुया समायोजन व पुनःस्थपना यानाः याकनं शान्ति प्रकृया व संविधान निर्माण यायेत सरकार गम्भीर जुया लगेजुयाच्वंगु धयादिल ।
पाकिस्तानी राजदूत हुसेनं पाकिस्तान नेपालय् न्हावलें शान्ति, स्थायित्व व विकास जुइमाःगु धइगु पक्षय् दुगु धयादिल ।
