संविधान निर्माणया ज्या मजूगु प्रति जनजाति महासंघया चिन्ता

नेपाल आदिवासी जनजाति महासंघं संविधानसभाया म्याद थप याःगु स्ववा दयेधुंकाः नं संविधान निर्माण यायेगु ज्या मन्ह्याःगु प्रति चिन्ता प्वंकूगु दु ।

महासंघया अध्यक्ष राजकुमार लेखीं बिहीवाः छगू विज्ञप्ति पिथनादिसें संविधान निर्माण प्रति राजनीतिक दलतय्सं क्यंगु उदासिनतां देय् गम्भीर दुर्घटनाय् लायेफइगु खँ न्ह्यथनादीगु दु । विज्ञप्ति राजनीतिक दलतय्त तत्काल संविधान निर्माण यायेगु ज्या न्ह्याकेत नं इनाप यानातःगु दु ।

संविधानसभाया झिंछगू समितिं तयार याःगु अवधारणपत्र व मस्यौदाय् राजनीतिक दलत दथुइ मतभेद खनेदुगु खँ विज्ञप्तिइ न्ह्यथसें न्हूगु संविधानया मस्यौदाया अन्तर वस्तुया सम्बन्धय् महासंघं ब्यूगु सुझावयात नं दुथ्याकेत अपील याःगु दु ।