सत्तारुढ दलत विदेशी इशाराय् न्ह्यानाच्वन : प्रचण्ड
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' सत्तारुढ दलत विदेशीया इशारा कथं न्ह्यानाच्वनागु द्वपं बियादीगु दु । वय्कलं विदेशीया हे इशाराय् माओवादी दुने विभाजन यायेगु कुतः जुयाच्वंगु नं धयादिल ।
झिगु दलया युवा नेतातय्सं राजनीतिक दलतय्त सहमति कार्यान्वयन यायेत दबाव बीगु निंतिं बिहीवाः येँय् याःगु अर्न्तक्रिया ज्याझ्वलय् प्रचण्डं विदेशी इशारा कथं न्ह्यानाच्वंगुलिं हे सहमति जुइमफुगु दाबी यानादिसें यदि निर्णय यायेगु अधिकार थःथःगु दलयात दुगु खःसा झिघौया दुने हे सहमति जुइगु दाबी यानादिल ।
ज्याझ्वलय् नेपाली कांग्रेस संसदीय दलया नेता रामचन्द्र पौडेलं निगूलिं पक्षं सहमति कार्यान्वयन यायेमाःगु धयादिल । वय्कलं विश्वासया संकटया कारणं असहमति जुयाच्वंगु धयादिसें दक्वसिनं उदारता क्यना न्ह्या: वनेमाःगु धयादिल । वय्कलं सहमति कार्यान्वयन यायेत माओवादी इमान्दार मजूगु द्वपं नं बियादिल ।
अथेहे एमाले नेता प्रदीप ज्ञवालीं सहमति कार्यान्वयनया निंतिं प्रधानमन्त्रीया राजीनामा मू खँ मजूगु धयादिसें माओवादीं पुलांगु सहमति व सम्झौता इमान्दार जुया पूवंकेमाःगु धयादिल ।
उगु ज्याझ्वलय् झिगू दलया युवा नेतातय्सं झिन्हुया दुने सहमति कार्यान्वयन यानाः न्ह्याः वनेत नेतातय्त इनाप याःगु खः ।
