'न्हूगु रणनीति दयेकाः न्ह्याः वनेमाः'
एकीकृत नेकपा (माओवादी)या पोलिटब्यूरो दुजःतय्सं सहमितया वातावरण क्षण जुयावनाच्वंगु धासें पार्टीं न्हूगु रणनीति दयेकाः न्ह्याः वनेमाःगु खँ धाःगु दु ।
बुधवाः च्वंगु पोलिटब्यूरोया बैठकय् पार्टी अध्यक्ष पुष्पकमल दाहाल 'प्रचण्ड'या राजनीतिक प्रतिवेदनय् थःथःगु बिचाः प्वंकूसें नेतातय्सं कांग्रेस व एमालें सहमतिया नांमय् माओवादीयात आत्मासमपर्ण याकेत स्वःगु धासें थंज्याःगु अवस्थाय् सहमति यायेमफइगु बिचा: प्वंकूगु खः ।
जेठ १४ गते प्रमुख स्वंगू दलत दथुइ जूगु स्वंगू बुँदे सहमति पालना मयानाः कांग्रेस व एमालें राजनीतिक बेइमानी याःगु खँ नं नेतातय्सं धाःगु दु । अथेहे अधिकांश नेतातय्सं माओवादी नेतृत्वय् राष्ट्रिय सहमतिया सरकार गठन मजुसाः प्रतिपक्षय् च्वनाः जुसां शान्ति व संविधान निर्माणया निंतिं सशक्त भूमिका म्हितेमाःगु खँय् बः ब्यूगु दु ।
मंगलवाः पार्टी अध्यक्ष प्रचण्डं राजनीतिक दलत दथुइ जुयाच्वंगु सहमतिया कुतः, सेना समायोजन, शान्ति व संविधान निर्माणया विषयत दुथ्याकाः राजनीतिक प्रतिवेदन न्ह्यब्वयादीगु खः । माओवादी पोलिटब्यूरोया मेगू बैठक बिहीवाः सुथय् हानं च्वनी ।
