सरकार असफल जूगु खनालया धापू
सत्ता नेतृत्व यानाच्वंगु नेकपा (एमाले)या अध्यक्ष झलनाथ खनालं थःगु पार्टीया नेतृत्वय् दुगु वर्तमान सरकार असफल जूगु खँ धयादीगु दु । वय्कलं थुगु सरकारं शान्ति प्रकृयायात क्वचायेके मफुगु व संविधान निर्माण यायेत नं असफल जूगु धयादिल ।
बुधवाः येँय् एमाले प्रचारप्रसार विभागया राष्ट्रिय भेलाया उल्लेज्या यानादिसें वय्कलं सहमति व सहकार्यया अभावय् सरकारं शान्ति व संविधानयात निष्कर्षय् थ्यंकेमफुगु धयादिल । वय्कलं थ्वस्वयां न्ह्यः दुगु माओवादी नेतृत्वया सरकार नं सहमतिया अभावय् शान्ति व संविधान निर्माणया कार्यभार पूवंकेत असफल जूगु धयादिल ।
प्रमुख स्वंगू दलत दथुइ जूगु स्वंगू बुँदे सहमति कार्यान्वयन यानाः शान्ति व संविधान निर्माण यायेगु पाखे वनेमाःगु धयादिसें वय्कलं थुकीया अगुवाइ एमालें यायेमाःगु खँय् बः बियादिल । वय्कलं एमाले दुने दक्षिणपन्थी बिचाःया हावी जुयाच्वंगु धयादिसें उकीयात बैचारिक रुपं परास्त यायेमाःगु धयादिल ।
