थुगुसी स्वंगू खर्ब स्वयां अप्वया बजेट वइगु
मंगलवाः च्वंगु सत्तारुढ दलया बैठकय् अर्थमन्त्री डा. सुरेन्द्र पाण्डें न्हूगु आर्थिक दँ ०६७/६८या बजेटया बारे जानकारी बियादीगु दु । वय्कलं सरकारं तयार यायेत्यंगु नीति व ज्याझ्वः व बजेटया सैद्धान्तिक पक्ष, चालु आयोजनाया निरन्तरता व प्राथमिकताया निंतिं ल्यःगु क्षेत्रया बारे जानकारी बियादीगु दु ।
प्रधानमन्त्री माधवकुमार नेपालं आर्थिक दँ ०६७/६८या नीति व बजेट तर्जुमाया सन्दर्भय् सत्ता साझेदार दल व सरकार समर्थित दलतय् राय व सुझाव कायेत सतादीगु बैठकय् अर्थमन्त्री पाण्डें थुगुसीया बजेट थ्वहे असार महिनाया लिप्पांगु वालय् वइगु व उगु बजेट ३ खर्ब ३५ अर्वया हाराहारीलय् जुइगु जानकारी बियादिल ।
बैठकय् सत्ता साझेदार व सरकार समर्थित दलया नेतातय्सं आगामी बजेट बृहत आकारय् ह्येगु स्वयां कार्यान्वयन पक्षयात बल्लाकेगु खाकाया योजना दुथ्याकेत सरकारयात सुझाव ब्यूगु खः । नेतातय्सं कृषि, शिक्षा व रोजगारीया क्षेत्रयात उच्च प्राथमिकता बीमाःगु खँ धाःगु खः ।
उगु बैठकय् माओवादी पाखें बजेट अधिवेशन अवरोध याःसा अध्यादेश मार्फत बजेट ह्येगु बारे नं सहलह जुसां चीचीधंगु दलया नेतातय्सं सहमतिया विकल्प मदुगु खँ धाःगु खः ।
