माओवादी पोलिटब्यूरो बैठक सुरु
सत्तारुढ नेपाली कांग्रेस व नेकपा (एमालें) सहमतिया निंतिं तयार याःगु कार्ययोजनाया बारे सहलह यायेत एकीकृत नेकपा (माओवादी)या बैठक सुरु जूगु दु ।
पार्टी मू ज्याकू येँया कोटेश्वर पेरिस डाँडाय् च्वनाच्वंगु बैठकय् निगू दलं तयार याःगु सहमतिया कार्ययोजनाय् दुथ्याकातःगु राष्ट्रिय सहमतिय सरकार, लडाकु समायोजन यायेगु बारेया खाका नापं शान्ति व संविधान निर्माणया बारे सहलह जुयाच्वंगु दु ।
अथेहे बैठकय् राष्ट्रिय सहमतिय सरकारया नेतृत्वय् पार्टी अध्यक्ष पुष्पकमल दाहाल 'प्रचण्ड'या विकल्पया बारे नं सहलह जुइगु खँ धाःगु दु । स्थायी समितिया बैठकं अध्यक्षया विकल्प न्ह्यब्वयेगु वा मयायेगु धकाः निर्णय यायेमफेवं थुकीया जिम्मा पोलिटब्यूरो बैठकयात ब्यूगु खः ।
माओवादी दुने न्हूगु सरकारया नेतृत्वया विकल्पया बारे विवाद ब्वलनाच्वंगु दु । पार्टी अध्यक्ष पक्षधरतय्सं प्रचण्ड हे न्हूगु प्रधानमन्त्रीया निंतिं छम्ह जक दावेदार कथं न्ह्यब्वयाच्वंगु दुसाः उपाध्यक्ष डा. बाबुराम भट्टराई पक्षधरतय्सं अध्यक्षया नांमय् सहमति मजुसाः पार्टी पाखें मेम्ह विकल्प मालेमाःगु खँय् बः बियाच्वंगु दु ।
