कांग्रेस महाधिवेशन हानं लिछ्याइगु संकेत
भदौ १० निसें १४ तक येँय् जुइत्यंगु नेपाली कांग्रेसया झिंनिक्वःगु महाधिवेशन हानं लिछ्याइगु संकेत खनेदुगु दु । महाधिवेशन न्ह्यः हे कांग्रेसं गां, क्षेत्र व जिल्ला अधिवेशन असार दुने क्वचायेगु ताः तयातःगु खःसां थ्व निर्धारित इलय् मजुइगुलिं महाधिवेशनय् हे लिछ्याइगु संकेत खनेदुगु खः । असार ६ निसें १५ गते दुने गां, क्षेत्र व जिल्ला अधिवेशन क्वचोगु कथं निर्वाचन समितिं महाधिवेशनया कार्यकतालिका पिथंगु खः ।
गां, क्षेत्र व जिल्ला अधिवेशन निर्धारित इलय् क्वमचाइगु जुसां कांग्रेस नेतातय्सं क्वःछिनातःगु इलय् हे महाधिवेशन यायेमाःगु खँय् बः बियाच्वंगु दु । थुकीया बारे सहलह यायेत मंगलवाः केन्द्रीय कार्यसमितिया बैठक च्वनेत्यंगु दु । थुगु हे बैठकं कांग्रेसया महाधिवेशन लिछ्यायेगु वा निर्धारित इलय् हे यायेगु बारे निर्णय याइगु खँ धा:गु दु ।
