थाय्मरुइ लखौंया लुँ खुया यन
येँ (सन्ध्या टाइम्स)/राजधानी येँदेय्या अतिकं व्यस्तगु थाय्मरु लागाय् लखौं तका बराबरया लुँ व वहः खुया यंकूगु दु। थाय्मरुया मू सतकय् च्वंगु आर.के. ज्वेलरीइ थौं वंगु चान्हय् करिब ३७ लाख तका बराबरया लुँ व वहःया ज्वलं खुया यंकूगु खः ।
खुँतय्सं उगु लुँवहः पसःया शटर गलं म्हुयाः प्वाः दयेकुसें अनं हे दुने दुहां वनाः खुया यंकूगु खः। उमिसं दुने च्वंगु लुँया तिसा व ढिक्का लुँ नापं वहःया ज्वलं व छुं ध्यबा नं खुया यंकूगु खः। प्रहरीं याःगु प्रारम्भिक छानबिन कथं अन फुक्कं यायेबलय् करिब ३७ लाख तका बराबरया धनमाल यंकूगु खने दु ।
खुँतय्सं उगु लागाय् नाइट गार्ड तकं तयातःम्ह बद्री फुयाँलयात ज्वनाः ज्यान कायेगु ख्याच्वः बिसें खुया यंकूगु खँ धाःगु दु। थौं प्रहरीं फुयाँलयात ज्वनाः बयान काःबलय् वं चान्हय् वःपिं स्वम्ह प्यम्ह ति खुँतय्सं थःत ज्वनाः क्षेत्रपाटीपाखे यंकूगु व अन थःके च्वंगु खुकुरी आदि ल्वाभः लाकाः पसलय् खुइगु ज्या याःगु खः। तर खुँतय्सं खुया यंकेसातकि वं प्रहरी व छेँथुवाःयात छाय् खबर मबिल धइगु खँ धाःसा सी मदुनि ।
उगु थासय् थौं सुथय् तकं खुया यंकूगु बारे छुं सी मदुनिगु खः। सुथय् १०.३० बजेपाखे पसः चायेकः वःबलय् तिनि शटर स्यंका तःगु खनाः खुया यंकूगु आशंका जूगु व लिपा दुने चायेकाः स्वःबलय् खुया यंकातःगु लुइकूगु खः ।
पसः स्थानीय लुँवहः व्यवसायी भाजु राजेन्द्रमान शाक्ययागु खः ।
