संसद च्वनेत झिगू दलया मुँज्या
येँ (सन्ध्या टाइम्स)/प्रधानमन्त्री माधव नेपालं वर्तमान सरकारय् दुथ्याःगु झिगू दलया मंकाः मुँज्या सःतादीगु दु। थौं सनिलय् सिंहदरवारय् च्वनीगु उगु मुँज्याय् बजेट अधिवेशन सःतेगु निंतिं म्हितेगु भूमिका, स्वंगू दलया दथुइ जूगु सहमति कार्यान्वयन नापं थीथी विषयस सहलह ब्याकादीगु खँ धाःगु दु ।
थ्वहे दथुइ बजेट अधिवेशन याकनं सःतके बीगु निंतिं व्यवस्थापिका संसदया सभामुख सुवासचन्द्र नेम्वाङं थौं नं थीथी दलया नेतातय्त नापलानाः सलहलह ब्याकादीगु दु। थौं एमालेया अध्यक्ष झलनाथ खनालया छेँ डल्लुइ हे वनाः नेम्वाङं सहलह ब्याकादीगु खः। अथे हे एकीकृत माओवादीया अध्यक्ष प्रचण्डलिसे नं सहलह ब्याकादीगु खँ धाःगु दु। उगु हे कथं वय्कलं म्हिगः प्रधानमन्त्री नेपाल नापं नेपाली कांग्रेसया कार्यवाहक सभापति सुशिल कोइरालायात नापलानाः सहलह ब्याकादीगु खः ।
