'नागरिक बेपत्ता याःपिंत कारवाही या'
नेपालय् झिदँ तक जूगु सशस्त्र द्वन्द्वया इलय् थीथी पक्षं नागरिकतय्त बेपत्ता याःपिंत कडा कारवाही यायेमाःगु खँय् नेतातय्सं बः ब्यूगु दु ।
राज्य पाखें बेपत्ता याःपिं नागरिकतय् छेँजः नं सोमवाः येँय् याःगु ज्याझ्वलय् एनेकपा (माओवादी)या अध्यक्ष पुष्पकमल दाहाल 'प्रचण्डं' थम्हं बेपत्ता जूपिं नागरिकतय् अवस्था सार्वजनिक यायेत स्वःगुलि हे सरकार त्वतेमाःगु खँ धयादिल । वय्कलं सेनाया लोकतान्त्रिकरण यायेत चाहे मजूपिसं बेपत्ता सार्वजनिक याये चाहे मजूगु द्वपं बियादिल ।
ज्यझ्वलय् नेपाःया निंतिं राष्ट्रसंघीय उच्च आयुक्तया ज्याकू प्रमुख रिचर्ड बेनेटं द्वन्द्व कालय् बेपत्ता जूपिनि बारे सत्यतथ्य खँ मालेमाःगु खँय् बः बियादिसें बेपत्ता याःपिंत कानूनं ब्यूगु अधिकार छ्यलाः कडा कारवाही यायेमाःगु धयादिल ।
अथेहे कांग्रेस संसदीय दलया नेता रामचन्द्र पौडेल व नेकपा (एमाले)या महासचिव इश्वर पोखरेलं बेपत्ता नागरिकतय् बारे अध्ययन यायेत छगू उच्चस्तरीय आयोग गठन यायेमाःगु धासें बेपत्ता यायेगु ज्याय् संलग्न जूपिं न्ह्याम्ह जुसां कडा कारवाही यायेमाःगु खँय् बः ब्यूगु खः ।
