थैवया हत्या बारे छानबिन यायेगु सहमति
वंगु वाःलय् रुपन्देही हत्या जुम्ह एमाले कार्यकर्ता प्रचण्ड थैवया हत्या बारे छानबिन यायेत सतरुद्ध दलत एकिकृत नेकपा (माओवादी) व नेकपा (एमाले) दथुइ सहमति जूगु दु ।
सोमवाः सुथय् एमाले ज्याकू बल्खुइ च्वंगु निगू दलया बैठकय् निगू दल दुथ्याःगु छगू छानबिन समिति गठन यायेग सहमति जूगु खः । बैठकय् एमालें थैवाया हत्या बारे छानबिन यायेत इनाप याःगु खसाः माओवादीं उकी सहमति प्वंकूगु खः ।
बैठकय् माओवादीयापाखें अर्थमन्त्री डा बाबुराम भट्टराई, माओवादी प्रवक्ता दिनानाथ शर्मा, नारायणकजि क्षेष्ठ लगायतया नेतापिंसं ब्वति काःगु खसाः एमालेपाखें अध्यक्ष झलनाथ खनाल, गृह मन्त्री बामदेव गौतम, उपाध्यक्ष अशोक राई, महसचिव ईश्वर पोखरेल लगायतया नेतातय्सं ब्वति काःगु खः ।
बैठकय् केन्द्रिय क्याम्पस कीपू लगायत देया थीथी थासय् जूगु स्वतन्त्र विद्यार्थी युनियन निर्वाचनया दिनाच्वंगु मतगनणा सुचारु यायेगु नं सहमति जूगु दु ।
