लाडकु शिविर तत्काल खाली यायेमाः : महत
उर्जा मन्त्री डा. प्रकाशशरण महतं माओवादी लडाकुया अस्थायी शिविर सैन्य तालिम केन्द्रया कथं विकास जुयाच्वंगुलिं तत्काल शिविर खाली यायेमाःगु खँ धयादीगु दु ।
नेपाल प्रेस युनियन मोरङं सोमवाः विराटनगरय् ग्वसाःग्वःगु पत्रकार सम्मेलनय् न्ववानादिसें वय्कलं लडाकु व ल्वाभः व्यवस्थापन, सैनिक व अर्ध सैनिक संरचना माओवादीं भंग मयायेकं सहमति जुइमफइगु धयादिल । वय्कलं माओवादीं लडाकुया ल्याः, मापदण्ड व प्रकृया बारे प्रष्ट खाका न्ह्यब्वये धुंकाः जक सरकारं राजीनामा बीगु धयादिल ।
माओवादी प्रधानमन्त्रीया राजीनमाय् जक केन्द्रीत जूगिलं समस्या झन जटिल जूगु धयादिसें वय्कलं कांग्रेसयात सरकार स्वयां शान्ति व संविधान महत्वपूर्ण जूगु धयादिल ।
अथेहे वय्कलं कांग्रेस युवादस्ता गठन यायेगु धाःगु बारे संचारमाध्यमं नकारात्मक प्रचार याःगु द्वपं बियादिसें कांग्रेसं सुं नापं ल्वायेत मखसें आत्मरक्षाया निंतिं जक युवा दस्ता गठन यायेत्यंगु स्पष्ट यानादिल ।
