व्यापारीतय् सुरक्षाया निंतिं सरकार प्रतिबद्ध : प्रम

प्रधानमन्त्री माधवकुमार नेपालं उद्योगी व्यवसायीतय् सुरक्षाया निंतिं सरकार गम्भीर व प्रतिबद्ध दुगु खँ धयादीगु दु ।

आइतवाः उद्योगी व्यवसायीतय् छगू पुचः नाप खँल्हाबंला यानादिसें प्रधानमन्त्री नेपालं सरकारया प्राथमिकता हे देशय् शान्ति व सुरक्षाया व्यवस्था यायेगु खँ धयादिल । नापं वय्कलं उद्योगी व्यवसायीतय् सुरक्षाया निंतिं सरकारं माःगु व्यवस्था यायेगु प्रतिबद्धता नं प्वंकादिल ।

उगु इलय् व्यवसायीतय्सं देय्या सुरक्षा अवस्था स्यनावंगु धासें उद्योगी व्यवसायीतय्त सुरक्षाया ग्यारेन्टी यायेत माग याःगु खः । उमिसं लिप्पांगु इलय् व्यवसायीतय्त ख्याच्वः वयेगु, अपहरण जुइगु व स्यायेगु तकंया ख्याच्वःत अप्वयाच्वंगु धासें प्रधानमन्त्रीया ध्यानाकर्षण याःगु खः ।