येँया वसुन्धाराय् तःधंगु मात्रय् विस्फोटक पदार्थ बरामद
छुं ई न्हि न्ह्यः येँया वसुन्धाराय् कार दुने बम विस्फोट याम्ह विष्णु शाहया बयान लिपा वसुन्धाराया छखाः छेँ नं प्रहरीं तःधंगु मात्रय् विस्फोटक पदार्थ बरामद याःगु दु । नीनिदँया विष्णु शाहया बयान लिपा प्रहरीं शुक्रवाः बहनी शाह बालं च्वनाच्वंगु पशुपतिनाथ श्रेष्ठया छेँय् छापा मारे याःगु इलय् विस्फोटक पदार्थ लुइकूगु खः ।
महनगरीय प्रहरी अपराध महाशाखाया पुचलं श्रेष्ठया छेँय् छाप मारे यायेगु झ्वलय् रकेट लाचर, उकी छ्यलीगु गोली, पाइप बम ५, सकेट बम २, इम्प्रोमाइन बेङलोर तारकेट २, २० लिटर स्प्रिट, सुतली बम दयेकीगु सामान, गन पाउडर, तार, टेलिफोन बम, क्यासेट बम, टिन बम, छर्राया निंतिं छ्यलीगु थीथी कथंया ज्वलं, पटका, प्रज्वलनशील पदार्थ लुइकूगु दु । उकी मध्ये विस्फोट जुइगु पदार्थयात बम डिस्पोजल पुचलं नष्ट याःगु दु ।
अथेहे शाहं ब्यूगु बयान कथं बसुन्धारा कार दुने बम विस्फोट याःगु पुचलं भाटभटेनी सुपरमार्केट, युनाइटेड वर्ल्ड ट्रेड सेन्टर, सांग्रिला होटल लगायतय् नं बम मुइकेगु तयार यानाच्वंगु खुलासा जूगु दु ।
