कोइरालाया ख्याच्वः लिपा युवा दस्ता घोषणा मजुल
थौं घोषणा यायेगु धाःगु नेपाली कांग्रेसया युवा दस्ता पार्टी कार्यवाहक सभापति सुशील कोइरालाया ख्याच्वः लिपा घोषणा जुइमफुत । शनिवाः सिन्धुपाल्चोकया चौतारय् ५००म्ह तरुण दस्ता घोषणा यायेगु तयारी जूगु खःसां उगु ज्याझ्वः छगू साधारण ज्याझ्वःया कथं जक सिमित जुल ।
शुक्रवाः कार्यवाहक सभापति कोइरालां पार्टी दुनेया नेता वा कार्यकर्ता सुनां नं युवा दस्ता घोषणा याःसा उमित कारवाही यायेगु ख्याच्वः बियादीगु खः । नापं वय्कलं नेपाली कांग्रेस छगू प्रजातन्त्रिक पार्टी जूगुलिं युवा दस्तायात समर्थन यायेमफइगु खँ धयादीगु खः ।
शनिवाः तरुण दस्ता घोषणा यायेगु धकाः ग्वसाःग्वःगु ज्याझ्वलय् कांग्रेसया वरिष्ठ नेता शेरबहादुर देउवा व केन्द्रीय दुजः खुम्बहादुर खड्काया ब्वति दुगु खः । ज्याझ्वलय् देउवां माओवादी ज्यायदती बन्द जुइमाःगु खँय् बः बियादीगु खःसा खड्कां देशय् जुयाच्वंगु डर, त्राससया अवस्था अन्त्यया निंतिं तरुण दस्ता आवस्यक जूगु धयादिसें अज्याःगु घोषणा यायेमब्यूगुलिं नेतृत्व प्रति आक्रोश प्वंकादीगु ख: ।
