'प्रधानमन्त्रीं न्याक्वः तक राजीनामा बीत स्वल'
नेकपा (एमाले)या वरिष्ठ नेता केपी शर्मा ओलीं प्रधानमन्त्री माधवकुमार नेपालं न्याक्वः तक राजीनामा बीत स्वःगु तर उकीयात थम्हं पनाःगु खँ धयादीगु दु ।
एमाले इटहरी नगरया न्हापांगु नगर प्रनितिधि बैठकया शनिवाः उल्लेज्या यानादिसें वय्कलं माओवादीं सहमति कार्यान्वयन मयायेकं प्रधानमन्त्रीं राजीनामा बीमज्यूगु धयादिसें थः येँ नं पिने जुइगु इलय् नं प्रधानमन्त्रीं राजीनामा बीयादीगु खःला धकाः चिन्ता जुइगु धयादिल ।
वय्कलं माओवादीं मेपिनिगु नेतृत्वया सरकार स्वीकार मयाइगु व मेपिंसं माओवादी नेतृत्वया सरकार स्वीकार मयाइगु अवस्था जूगुलिं समस्या जूगु धयादिल । नापं वय्कलं राष्ट्रिय सहमतिया नांमय् माओवादी नेतृत्वया सरकार स्वीकार यायेमफइगु धयादिल ।
माओवादीयात दुर्घटना पाखें एमालें हे बचे याःगु दाबी यानादिसें आः नं माओवादीं थःगु बानीयात सुधार मयासाः सुनां नं बचे मयाइगु धयादिल । वय्कलं माओवादीं एमाले व कांग्रेसयात समाप्त यानाः वनेत स्व:गु खःसा की अथे यानाः वनेमाल मखुसा लडाकु समायोजन व पुनर्स्थापनाय् ग्वाहालि यानाः संविधान निर्माणय् ग्वाहालि यायेमाःगु धयादिल ।
