प्रधानमन्त्री नापं बागू दर्जन मन्त्री विरामी
येँ (सन्ध्या टाइम्स)/ताल्लाया मौसम, सर्वसाधारण विरामी जुइगु ला स्वाभाविक हे जुल। थौंकन्हय् धाःसा सर्वसाधारण जक मखु, मन्त्री व प्रधानमन्त्री तकं विरामी जुयाच्वंगु दु।
दकलय् न्हापां ला प्रधानमन्त्री माधव नेपाल हे आउँ जुयाः लासाय् लानाच्वंगु दु। निम्ह उप्रधानमन्त्रीत मध्ये विजय गच्छेदार मिखाया वासः याकेगु धकाः न्हू दिल्ली वनेधुंकूगु दुसा मेम्ह उपप्रम सुजाता कोइराला नं वासः याकेत न्हूदिल्ली वनीगु जुयाच्वंगु दु। अथे हे रक्षा मन्त्री विद्या भण्डारी नं नियमित परीक्षण धकाः दिल्ली वनेत्यंगु दु ।
मेखे उर्जा मन्त्री डा. प्रकाश शरण महत नं झाडाबान्ता जुयाः आराम यानाच्वंगु दुसा म्हिगः दबुली दयाः घाःपाः जुयादीम्ह एमाले अध्यक्ष झलनाथ खनालं नं झाडाबान्ता हे जुयाच्वंम्ह खः। प्रमुख प्रतिपक्षी नेता पुष्पकमल दाहाल मानसिक तनाव जुल धकाः ख्वाउँगु हेलम्बुपाखे वनाः उकुन्हु तिनि लिहां झाःगु ला सकस्यां सिउगु हे खँ जुल ।
